کراچی:آل پاکستان نیوز پیپرز سوسائٹی کے دو رکنی وفد نے کراچی میں سندھ کے سینئر وزیر سندھ شرجیل انعام میمن سے ملاقات کی۔ وفد میں اے پی این ایس کے صدر سینیٹر سرمد علی اور سیکریٹری جنرل محمد اطہر قاضی شامل تھے۔
اے پی این ایس کے عہدیداران نے سینئر وزیر شرجیل انعام میمن کو اخباری صنعت کو درپیش مسائل سے آگاہ کیا اور وفد نے پرنٹ میڈیا کے حجم میں اضافے، علاقائی و لسانی پریس کی اہمیت پر زور دیا۔
اس موقع پر سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن کا کہنا تھا کہ سندھ حکومت آزادی صحافت اور اخبارات کے کردار کی معترف ہے، پرنٹ میڈیا معاشرے میں شعور اجاگر کرنے اور جعلی خبروں کے خلاف عوام کو درست معلومات فراہم کرنے میں کلیدی حیثیت رکھتا ہے۔
انہوں ںے کہا کہ حکومت سندھ اخباری صنعت کے تمام جائز مسائل کو ترجیحی بنیادوں پر حل کرے گی، اخباری صنعت کو درپیش مسائل کے حل کے لئے متعلقہ محکموں کو ہدایات جاری کی جائیں گی۔
