انسداد دہشتگردی عدالت اسلام آباد نے بانی پی ٹی آئی کی بہنوں علیمہ خان اور عظمیٰ خان کے وارنٹ گرفتاری جاری کر دیے
انسداد دہشتگردی عدالت اسلام آباد نے بانی پی ٹی آئی عمران خان کی بہنوں علیمہ خان اور عظمیٰ خان کے وارنٹ گرفتاری جاری کر دیے۔
انسداددہشت گردی عدالت اسلام آباد میں پی ٹی آئی رہنماؤں اور دیگر کےخلاف 4 اکتوبر احتجاج کیس کی سماعت جج طاہر عباس سپرا نے کی۔
دوران سماعت عدالت نے مسلسل عدم پیشی پر علیمہ خان اور عظمیٰ خان کے وارنٹ گرفتاری جاری کر دیے، عدالت نے علیمہ خان اور عظمی خان کو گرفتار کرکے پیش کرنے کا حکم بھی جاری کیا۔
بعد ازاں عدالت نے کیس کی مزید سماعت 22 نومبر تک ملتوی کر دی۔ واضح رہے کہ علیمہ خان اور عظمیٰ خان کے خلاف تھانہ کوہسار میں مقدمہ درج ہے۔
